សមាគមអតីតយុទ្ធជនជំទាស់ការសុំតម្កល់រូបសំណាកលោក កែម ឡី នៅទីលានប្រជាធិបតេយ្យ

រូបសំណាក និងអ្នកស្មូនរូបសំណាកលោក បណ្ឌិត កែម ឡី។ រូបថត ហ្វេសប៊ុក

Mon, 22 August 2016
ឡាយ សាមាន
ភ្នំពេញប៉ុស្តិ៍
ភ្នំពេញៈ សមាគមអតីតយុទ្ធជនកម្ពុជាបានប្រកាសប្រឆាំងដាច់ខាតចំពោះសំណើរបស់តំណាងរាស្ត្រគណបក្សសង្គ្រោះជាតិដែលស្នើសុំសង់រូបសំណាកលោក បណ្ឌិត កែម ឡី នៅទីលានប្រជាធិបតេយ្យដោយសមាគមដែលមាននិន្នាការគាំទ្ររដ្ឋាភិបាលនេះបានចំអកថាលោក កែម ឡី មិនមានស្នាដៃអ្វីដើម្បីជាតិដែលមិនអាចប្រៀបស្មើនឹងទាហានដែលហ៊ានពលីជីវិតដើម្បីការពារទឹកដីនៅតាមព្រំដែននោះផងទេ។
ការប្រកាសបែបនេះបានធ្វើឡើងបន្ទាប់ពីតំណាងរាស្ត្រគណបក្សសង្គ្រោះជាតិនៅមណ្ឌលតាកែវលោក អ៊ូ ច័ន្ទរ័ត្ន បានស្នើអភិបាលរាជធានីភ្នំពេញតម្កល់រូបសំណាក កែម ឡី ដែលត្រូវបានគេបាញ់សម្លាប់នៅក្នុងបរិវេណទីលានប្រជាធិបតេយ្យដោយអះអាងថាដើម្បីរំឭកពីវីរភាពក្នុងការបញ្ចេញមតិលាតត្រដាងការពិតពីបញ្ហានៅក្នុងសង្គមរបស់គាត់រហូតដល់ត្រូវគេបាញ់សម្លាប់។
ក្នុងលិខិតរបស់លោក អ៊ូ ច័ន្ទរ័ត្ន ចុះថ្ងៃទី ១៧ សីហាបញ្ជាក់ថា៖ «ជាមួយគ្នានេះពួកគាត់ព្រមទាំងរូបខ្ញុំផ្ទាល់មានបំណងសាងសង់ និងតម្កល់រូបសំណាកលោកបណ្ឌិត កែម ឡី នៅបរិវេណទីលានប្រជាធិបតេយ្យដើម្បីរំឭកដល់វីរភាពរបស់លោកបណ្ឌិតដែលលោកជានិមិត្តរូបនៃសេរីភាពបញ្ចេញមតិ»។
លោក អ៊ូ ច័ន្ទរ័ត្ន បានប្រាប់ភ្នំពេញប៉ុស្តិ៍កាលពីម្សិលមិញថា៖ «ខ្ញុំមិនបដិសេធទេចំពោះយុទ្ធជនដែលពលីជីវិត ពលិកម្មសម្រាប់ប្រទេសជាតិគួរទទួលបានការដឹងគុណ ការគោរពដូចគ្នាចឹង»។
តែលោកថាដោយឡែកលោកបណ្ឌិត កែម ឡី ក៏សមនឹងអនុញ្ញាតឱ្យមានសង់រូបសំណាកនៅទីលានប្រជាធិបតេយ្យដែរដោយសាររូបគាត់ហ៊ានបញ្ចេញមតិនិយាយអ្វីដែលជាការពិតដើម្បីឱ្យពលរដ្ឋខ្មែរបានដឹងពីសង្គមជាក់ស្តែង និងត្រូវបានទទួលស្គាល់ដោយមតិជាតិ និងអន្តរជាតិ។
នៅក្នុងគេហទំព័ររបស់អគ្គលេខាធិការដ្ឋានសមាគមអតីតយុទ្ធជនកម្ពុជាដែលបានបង្ហោះកាលពីម្សិលមិញបានលើកឡើងថា៖ «ជាង ៨ ឆ្នាំកន្លងមកនាយទាហាន នាយទាហានរង និងពលទាហានទាំងអស់នៅ (កងពលតូចអន្តរាគមន៍លេខ ៨) មិនបានសម្រាកទាំងថ្ងៃទាំងយប់។ មិនបានសម្រាកព្រោះត្រូវប្រឈមមុខជាមួយសត្រូវដែលវាចង់បានប្រាសាទព្រះវិហារប្រាសាទតាមាន់ និងតាក្របី ព្រមទាំងតំបន់ជាច្រើនឯទៀតតាមព្រំដែន កម្ពុជា-ថៃ។ តើលោក កែម ឡី កន្លងមកមានស្នាដៃអ្វីខ្លះចំពោះជាតិលើសពួកខ្ញុំនោះ?»។
សមាគមអតីតយុទ្ធជនកម្ពុជាបានលើកឡើងបែបចំអកថា៖ «បើគេទាមទារឲ្យលោក កែម ឡី ជាវីរជនអ៊ីចឹងយុទ្ធមិត្តពួកខ្ញុំជាច្រើនដែលបានបូជាលះបង់ជីវិតសាច់ស្រស់ឈាមស្រស់ដើម្បីប្រទេសជាតិពិតប្រាកដនោះគួរតែត្រូវបានផ្តល់ងារអ្វីមួយដែលលើសពីលោក កែម ឡី ឬក៍ត្រូវសាងរូបសំណាកដែលមានទំហំធំជាងរូបសំណាកលោក កែម ឡី ជាច្រើនម៉ឺនដងសម្រាប់ពួកយើងខ្ញុំម្នាក់ៗដែលបានលះបង់ជីវិតនៅសមរភូមិ»។ «ក៏ប៉ុន្តែពួកខ្ញុំមិនត្រូវការកិត្តិយសដល់ថ្នាក់ហ្នឹងទេតែយើងខ្ញុំជំទាស់ដាច់ខាតចំពោះសំណើរបស់គណបក្សសង្គ្រោះជាតិ និងពួកជ្រុលនិយមមួយចំនួនតូចដែលចង់ដាក់រូបសំណាកលោក កែម ឡី នៅទីលានប្រជាធិបតេយ្យ»។ «យើងខ្ញុំជានាយទាហាន នាយទាហានរង និងពលទាហានទាំងអស់នៅកងពលតូចអន្តរាគមន៍លេខ ៨ ក៏ដូចជាកងពលផ្សេងៗសង្ឃឹមថាសាលារាជធានីភ្នំពេញនឹងមិនអនុញ្ញាតតាមការស្នើសុំរបស់គណបក្សសង្គ្រោះជាតិនោះឡើយ»។
ភ្នំពេញប៉ុស្តិ៍មិនទាន់អាចសុំការអត្ថាធិប្បាយពីអគ្គលេខាធិការ សមាគមអតីតយុទ្ធជនលោក គន់ គីម និងអ្នកនាំពាក្យក្រសួងការពារជាតិលោក ឈុំ សុជាតិ បាននៅឡើយទេ។ ចំណែកអ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទាលោក សួង ម៉េងឡុង ក៏មិនអាចទាក់ទងបានដែរខណៈលោក តូច ចាន់នី ធ្លាប់ជាអ្នកនាំពាក្យសុំមិនធ្វើអត្ថាធិប្បាយ។
ចំណែកអ្នកនាំពាក្យសាលារាជធានីភ្នំពេញលោក មាន ចាន់យ៉ាដា ថ្លែងថាលោកមិនទាន់បានឃើញលិខិតផ្លូវការរបស់សមាគមអតីតយុទ្ធជនកម្ពុជានៅឡើយខណៈការស្នើសុំឱ្យមានការដាក់រូបសំណាកលោក កែម ឡី នៅទីលានប្រធិបតេយ្យក៏មិនទាន់សម្រេច។
លោកថា៖ «យើងអត់ទាន់សម្រេចយ៉ាងម៉េចទេយើងកំពុងដាក់សំណើជូនថ្នាក់ដឹកនាំឯកឧត្តមអភិបាលហើយតែមិនទាន់សម្រេចយ៉ាងម៉េចទេ»។
ទាក់ទងនឹងការប្រកាសរបស់សមាគមអតីតយុទ្ធជនកម្ពុជាវិញលោកថា៖ «សាលារាជធានីអត់ទាន់បានទទួលលិខិតជាផ្លូវការទេអ៊ីចឹងបានបងនិយាយថាចុះមនុស្សទាំងអស់ដែលបង្ហូរឈាមដោយសារជាតិជាក់ស្តែងតើត្រូវដាក់រូបចឹងដែរឬយ៉ាងម៉េច!»។
លោក កែម ឡី ដែលជាអ្នកវិភាគល្បីឈ្មោះហ៊ាននិយាយការពិតពីបញ្ហានៅក្នុងសង្គមត្រូវបានខ្មាន់កាំភ្លើងបាញ់សម្លាប់ទាំងកណ្តាលថ្ងៃនៅកណ្តាលទីក្រុងភ្នំពេញកាលពីថ្ងៃទី ១០ ខែកក្កដាហើយសពរបស់លោកត្រូវបានយកទៅបញ្ចុះនៅក្នុងស្រុកកំណើតក្នុងខេត្តតាកែវដែលមានអ្នកចូលរួមដង្ហែសពត្រូវគេប៉ាន់ប្រមាណថាមានប្រមាណពីរលាននាក់។ គិតរហូតមកដល់ថ្ងៃអាទិត្យម្សិលមិញនៅតែមានប្រជាពលរដ្ឋជាហូរហែមកពីតាមបណ្តាខេត្តនានានៅតែបន្តទៅអុជធូបគោរពនៅកន្លែងតម្កល់សពរបស់អ្នកវិភាគរូបនេះនៅឡើយ៕

Contact author: ឡាយ សាមាន