ក្រសួងធនធានទឹក អំពាវនាវឲ្យប្រុងប្រយ័ត្នខ្ពស់ចំពោះការមានភ្លៀងខ្លាំង

យានយន្តបើកតាមផ្លូវកាត់ភ្លៀងក្នុងរាជធានីភ្នំពេញកន្លងមក។ ផា លីណា

ភ្នំពេញៈ ក្រសួងធនធានទឹក និងឧតុនិយមកាលពីម្សិលមិញបានអំពាវនាវដល់អាជ្ញាធរ និងប្រជាពលរដ្ឋដែលរស់នៅតាមដងទន្លេមេគង្គឲ្យបង្កើនការប្រុងប្រយ័ត្នខ្ពស់ចំពោះឥទ្ធិពលនៃប្រព័ន្ធសម្ពាធទាបដែលនាំមកនូវភ្លៀងធ្លាក់យ៉ាងច្រើនក្នុងអាងទន្លេមេគង្គដែលអាចនឹងបង្កឲ្យមានផលប៉ះពាល់ដល់កសិផលខណៈដែលតំបន់មួយចំនួនកំពុងជួបគ្រោះរាំងស្ងួតនៅឡើយ។

លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានប្រាប់ភ្នំពេញប៉ុស្តិ៍ថានៅពេលនេះព្យុះឈ្មោះ NIDA បានថយឥទ្ធិពលប៉ុន្តែប្រព័ន្ធសម្ពាធទាបមួយបានកើនឡើង និង អូសកាត់ពីលើអាងទន្លេមេគង្គដែលនឹងធ្វើឲ្យមានភ្លៀងធ្លាក់ច្រើនក្នុងអាងទន្លេមេគង្គ និងក្នុងប្រទេសកម្ពុជា។

លោកបញ្ជាក់ថា៖ «ក្នុងស្ថានភាពបែបនេះនឹងធ្វើឲ្យកម្ពស់ទឹកទន្លេមេគង្គកើនឡើងជាបន្តបន្ទាប់។ ហេតុដូច្នេះប្រជាកសិករដែលរស់នៅតាមដងទន្លេគប្បីរួសរាន់ប្រមូលផលដំណាំព្រមទាំងបង្កើនការប្រុងប្រយ័ត្នខ្ពស់ជាប់ជាប្រចាំដើម្បីចៀសវាងការខាតបង់ និងគ្រោះថ្នាក់ផ្សេងៗកើតឡើងជាយថាហេតុ»។

ជាមួយគ្នានេះលោកបានអំពាវនាវសុំឲ្យអាជ្ញាធរពាក់ព័ន្ធធ្វើការផ្សព្វផ្សាយ និងណែនាំដល់ប្រជាពលរដ្ឋឲ្យត្រៀមបង្ការចំពោះគ្រោះទឹកជំនន់ដែលនឹងអាចកើតមាននៅតាមតំបន់វាលទំនាបមួយចំនួនពិសេសការពារនឹងហាមឃាត់កុមារ និងចាស់ជរាចុះងូតទឹកទន្លេដែលបច្ចុប្បន្នកំពុងហក់ឡើងខ្ពស់ និងមានលំហូរខ្លាំង។

ទោះជាបែបណាក្ដីលោក ប៉ៃ ថងឈុត អាយុ ៥៦ ឆ្នាំ ជាជនជាតិភាគតិចឡាវរស់នៅភូមិស្វាយរៀង ឃុំ តាឡាត ស្រុកសេសាន ខេត្តស្ទឹងត្រែង បានឲ្យដឹងថា កម្ពស់ទឹកទន្លេមេគង្គក្នុងខេត្តស្ទឹងត្រែងបានចាប់ផ្ដើមហក់ឡើងសាជាថ្មីវិញក្នុងរយៈពេលពីរបីថ្ងៃមកនេះ ប៉ុន្តែវានៅតែមានកម្រិតទាបជាងឆ្នាំមុនប្រមាណជិត ២ ម៉ែត្រដែលធ្វើឲ្យមានក្ដីព្រួយកង្វល់ពីបញ្ហាកង្វះខាតទឹក និងធនធានជលផលពិសេសគឺត្រី។

លោកបានបញ្ជាក់ថា៖ «ការរស់នៅរបស់ពួកយើងពឹងអាស្រ័យលើការដាំដុះ និងនេសាទប៉ុន្តែក្នុងរយៈពេលពីរឆ្នាំកន្លងមកនេះភាពរាំងស្ងួតបានធ្វើឲ្យពួកយើងមិនអាចដាំដុះបានហើយនេសាទត្រីក៏មិនបានគ្រប់គ្រាន់ផងដែរ»។

ស្រដៀងគ្នានេះដែរប្រជាកសិករនៅស្រុកចិត្របូរី ខេត្តក្រចេះលោក គិត សុខ បានឲ្យដឹងថានៅពេលនេះដំណាំដំឡូងមីរបស់លោកកំពុងត្រូវការទឹកភ្លៀងមកជួយសង្គ្រោះព្រោះចាប់តាំងពីលោកបានដាំដុះវាកាលពីដើមខែមិថុនាមកទឹកភ្លៀងមិនបានធ្លាក់ទៀងទាត់ និងគ្រប់គ្រាន់នៅឡើយនោះទេ។

លោក សុខ ថ្លែងបន្តថា៖ «ក្នុងរយៈពេលពីរឆ្នាំនេះការដាំដុះដំឡូងមីមិនទទួលបានផលចំណេញនោះទេព្រោះតែភាពរាំងស្ងួត។ ពួកយើងនឹងជួបប្រឈមទៅនឹងភាពអត់ឃ្លានថែមទៀតប្រសិនបើកម្រិតទឹកទន្លេទាបដូចឆ្នាំមុនហើយភាពរាំងស្ងួតនៅតែបន្តអូសបន្លាយ»។

លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានថ្លែងកាលពីម្សិលមិញដោយសង្កត់ធ្ងន់ទៅលើកម្រិតទឹកនៅតាមដងទន្លេថានៅមានកម្រិតទាបបើធៀបទៅនឹងឆ្នាំមុនដែលជាឆ្នាំដ៏អាក្រក់បំផុតដែលកម្ពុជាមិនធ្លាប់ជួបប្រទះ។

លោកថ្លែងថា៖ «រហូតមកទល់ពេលនេះយើងអាចនិយាយបានថាយើងមិនមានក្ដីព្រួយកង្វល់ពីបញ្ហាគ្រោះទឹកជំនន់ទេតែយើងបារម្ភពីកង្វះទឹកប្រើប្រាស់ខណៈទឹកទន្លេនៅមានកម្រិតទាបនៅឡើយ»។

បើតាមការព្យាករណ៍កម្ពស់ទឹកជំនន់របស់ក្រសួងធនធានទឹកដែលបានចេញផ្សាយកាលពីម្សិលមិញទឹកទន្លេមេគង្គនៅខេត្តស្ទឹងត្រែងមានកម្ពស់ ៥,៧០ ម៉ែត្រទាបជាងកាលពីឆ្នាំមុន ១,៨៤ ម៉ែត្រនៅខេត្តក្រចេះមានកម្ពស់ ១២,៩៨ ម៉ែត្រទាបជាងឆ្នាំមុន ៣,៣៨ ម៉ែត្រ។

ទោះជាបែបណា ការព្យាករណ៍បានបញ្ជាក់ថាកម្ពស់ទឹកនៅតាមបណ្ដាស្ថានីយជលសាស្ត្រទាំង ៧ នឹងបន្តកើនឡើងជាបន្តបន្ទាប់៕

ប្រភព ះ ភ្នំពេញប៉ុសិ៍្ត